قصيدة "ياليلة العيد"

هانتكلم عن الماضي 
وعن أيام ماتتعوضش
وعن قاعدتنا عالقهوة
وعن لمتنا يوم الماتش

وعن مصروف ريـال في اليوم
وعن حصالة الأحلام
وعن حدوتة قبل النوم
وعن أجمل سنين وأيام

وعن عملات بقت ماضي
وعن رقة حنان ماضي
وعن يوم امتحان الدين
وعن دعوة يارب استر
وعن حلمك ب كيس بلالين
وكراسة 9 تسطر

وعن ريحة خبيز ستي
وأول يوم في مدرستى
عن الجلاد وألوانه
ونكش فراخ ف كراستي
عن الفانكوش 
بعشرة قروش 
نجيب كاراتيه
وعن قلبظ وفرقع لوز 
بربع جنيه

وعن ماجد وعن كعبول 
عن النينجا وعن رشدان
عن الراديو اللي علمنا
ولمتنا في بعض زمان
وعن رمضان
وأجمل فرحة في الدنيا 
وجملة... مدفع الإفطار
وعن بكار
عن الفوانيس
عن الفوازير
وطعم الماية جوه الزير
عزومة عيلتي واللمة في أول يوم
وعمى يقول بلاش داوشة نقول مفهوم

ولعب البلي في الشارع
ولعب السمكة والصياد
ولعب الكورة في الحارة
ختامه خناقة كالمعتاد
وعن مدرستي مشتركة
بتتحمل بنات وولاد
عن الصلصال ودودة الأز
وعن سرقة في بنك الحظ
وعن فرحتنا بالمصيف
وعن رحلة ل رأس البر
وعشق الشط وقت الحر
عن البحر اللي بيوزع 
فريسكا ولب سوداني
وعن عوامة بنت أصول
بتسأل لسه مين تاني؟
وعن عمو اللي بيصور
عشان الذكريات ماتموتش
وعند غدوة سمك تقتل
تنيمنا ننام مانقومش
مانصحاش إلا يوم العيد
وعن فرحة ب طقم جديد
ينام جمبي ويحضني
يغنيلك يا ليلة العيد